La Poesia di GONZO
(*)
Co' se deventa veci
Co' se deventa veci,
come la vita
anca la vena poetica
va' in malora,
se ne va'
forsi all'altro mondo!
Ah!, le bele poesie d'amor,
i slanci e i sogni,
i dolsi romanticismi
e i dolori
del giovane Werter!
Ah! I viagi nei sogni
de passion lontane,
de lote e de destini,
de dolcissime ilusion
e de paradisi perdui!
Ah! Ah! Ah!
Ma no xe vero gnente!
I ne la conta
e i ne la dise:
dai, moleghela. Lassa 'ndar!
Oramai .
E mi, malegnaso che son,
li mando tuti a quel paese!
(ma qualo po'? no se sa,
ma no importa: se semo capii istesso).
Perché, porca miseria,
mi i me paradisi
no li go perdui
li go ancora qua
drento de mi.
E cussì i me sogni
i me amori
e parfin le me passion!
Ansi, secondo mi
(e un poco, forsi, me vergogno)
so' ancora puteo
ma proprio de quei picoli,
'nocenti e ingenui.
Coi oci spalancai
e el cor verto par tuto.
Che senso gavaria la vita
se no la fosse
un nassar continuo,
un cressar
e un tornar indrio,
un beato ritrovarse putei,
no digo inocenti
ma coi oci sempre spalancai,
pieni de maravegia
e de continuo stupor?
Eco qua:
tanti amighi
dopo tanti ani,
tanti fradei
fioi de na stessa mare.
E ve par poco?
Per poco che la sia
mi ve dedico 'sta poesia
(ciamemola cussì)
e 'ste riflession
da vecioto putelo
che no cressarà mai.
E ve saludo tuti
co tuto el cuor.
Guido Gonzo
(*) poesia letta dall'autore Guido Gonzo ('52 - '55) il 21 settembre 2003, in occasione dell'incontro tra ex allievi Nunziatella del Veneto e del Friuli Venezia Giulia nella tenuta agricola di Elizabeth e Roberto Ribetti a Cison di Valmarino.
Oppure